മെയ്ഡ് ഇൻ ഇന്ത്യ ചിപ്പും 6G യും ഈ വർഷം; രാജ്യം മൂന്നാമത്തെ വലിയ സമ്പദ് വ്യവസ്ഥയിലേക്ക്
ഇന്ത്യ ലോകത്തിലെ ഏറ്റവും വേഗത്തിൽ വളരുന്ന പ്രധാന സമ്പദ്വ്യവസ്ഥയാണെന്ന് പ്രധാനമന്ത്രി നരേന്ദ്ര മോദി. രാജ്യം “വളരെ വേഗം” ലോകത്തിലെ മൂന്നാമത്തെ വലിയ സമ്പദ്വ്യവസ്ഥയാകും. ഇന്ത്യയുടെ വളർച്ച വിദഗ്ധർക്ക് ലോക വളർച്ചയിൽ രാജ്യത്തിന്റെ സംഭാവന ഏകദേശം 20% ആകുമെന്ന വിശ്വാസം ഉണ്ടാക്കിയതായി അദ്ദേഹം പറഞ്ഞു. എക്കണോമിക് ടൈംസ് വേൾഡ് ലീഡേഴ്സ് ഫോറത്തിൽ സംസാരിക്കുകയായിരുന്നു അദ്ദേഹം.
കഴിഞ്ഞ ദശകത്തിൽ ഇന്ത്യയിൽ ഉണ്ടായ മാക്രോ ഇക്കണോമിക് സ്ഥിരതയാണ് ഈ ആത്മവിശ്വാസത്തിന്റെ പ്രധാന കാരണം. നമ്മളുടെ ധനകമ്മി 4.4 ശതമാനമായി കുറയുമെന്നാണ് പ്രതീക്ഷ. കോവിഡ് പോലുള്ള വലിയ പ്രതിസന്ധിയെ നേരിട്ടിട്ടും ഈ സ്ഥിതിയിലേക്ക് എത്താനായി. ഇന്ന് നമ്മുടെ കമ്പനികൾ മൂലധന വിപണിയിൽ നിന്ന് റെക്കോർഡ് തുകകൾ സമാഹരിക്കുന്നു. നമ്മുടെ ബാങ്കുകൾ എന്നത്തേക്കാളും ശക്തമാണ്. പണപ്പെരുപ്പം വളരെ കുറവും പലിശനിരക്കുകൾ ഏറെ താഴ്ന്നതുമാണ്. അതോടൊപ്പം തന്നെ നമ്മുടെ കറന്റ് അക്കൗണ്ട് കമ്മി നിയന്ത്രണത്തിലാണെന്നും പ്രധാനമന്ത്രി വ്യക്തമാക്കി.
രാജ്യത്തിന്റെ വിദേശനാണ്യ ശേഖരവും വളരെ ശക്തമാണ്. അതുമാത്രമല്ല, ഓരോ മാസവും ലക്ഷക്കണക്കിന് ആഭ്യന്തര നിക്ഷേപകർ എസ്ഐപി വഴി ആയിരക്കണക്കിന് കോടി രൂപ വിപണിയിൽ നിക്ഷേപിക്കുന്നു. ഇന്ത്യക്ക് ലോകത്തെ മന്ദഗതിയിലുള്ള വളർച്ചയിൽ നിന്ന് രക്ഷിക്കാൻ കഴിയും. തിരമാലകളുടെ ദിശ മാറ്റുന്നവർ നമ്മളാണ്. ബഹിരാകാശ രംഗത്തും ഇന്ത്യ മുന്നേറ്റങ്ങളുണ്ടാക്കി. ഈ വർഷം ബഹിരാകാശ സ്റ്റാർട്ടപ്പുകൾക്കായി 1000 കോടി രൂപയുടെ വെഞ്ച്വർ ക്യാപിറ്റൽ ഫണ്ട് സർക്കാർ സ്ഥാപിച്ചു. ,2014-ൽ ഒരു സ്റ്റാർട്ടപ്പ് മാത്രമുണ്ടായിരുന്നിടത്ത് ഇന്ത്യ 300-ലധികം ബഹിരാകാശ സ്റ്റാർട്ടപ്പുകളുടെ കേന്ദ്രമാണ്.
50-60 വർഷം മുമ്പ് തന്നെ ഇന്ത്യക്ക് സെമികണ്ടക്ടറുകൾ നിർമിക്കാമായിരുന്നു. എന്നാൽ മുൻ സർക്കാരുകൾ സാങ്കേതികവിദ്യയിലും നവീകരണത്തിലും ഉള്ള അവസരങ്ങൾ നഷ്ടപ്പെടുത്തിയതിനാൽ രാജ്യത്തിന് ആ ബസ് കയറാനാകാതെ പോയി. തെരഞ്ഞെടുപ്പ് ഫലങ്ങൾക്കപ്പുറം കാര്യങ്ങള് ചിന്തിക്കാതിരുന്നതാണ് ഇതിന് കാരണമെന്നും അദ്ദേഹം കൂട്ടിച്ചേർത്തു.
2015-ന് ശേഷം ഇന്ത്യ തങ്ങളുടെ സമീപനം മാറ്റി. ബസ് കയറുക മാത്രമല്ല, ഡ്രൈവിംഗ് സീറ്റിൽ ഇരിക്കുകയും വികസനത്തിന്റെ ഗിയറുകൾ സ്വന്തം കൈകളിൽ എടുക്കുകയും ചെയ്തു. ഇന്ത്യയിൽ സെമികണ്ടക്ടർ ഫാക്ടറികൾ സ്ഥാപിക്കപ്പെട്ടു തുടങ്ങി. ഈ വർഷാവസാനത്തോടെ ആദ്യത്തെ ‘മെയ്ഡ് ഇൻ ഇന്ത്യ’ ചിപ്പ് വിപണിയിൽ എത്തും. 6ജി സ്ഥാപിക്കുന്നതിലും ഇന്ത്യ വളരെ വേഗത്തില് മുന്നേറുകയാണെന്നും അദ്ദേഹം പറഞ്ഞു.
