ഓണാഘോഷത്തിൽ മുസ്ലിം കുട്ടികൾ പങ്കെടുക്കരുതെന്ന് അധ്യാപികയുടെ സന്ദേശം: കേസ്, സസ്പെൻഷൻ
ഓണാഘോഷത്തിൻ്റെ പേരിൽ വിദ്യാർത്ഥികൾക്കിടയിൽ ഭിന്നതയുണ്ടാക്കാൻ ശ്രമിച്ച സ്കൂൾ അധ്യാപികയ്ക്കെതിരെ കേസ്. തൃശൂരിലെ കടവല്ലൂരിലുള്ള സിറാജുൽ ഉലൂം ഇംഗ്ലീഷ് ഹൈസ്കൂളിലെ അധ്യാപിക ഖദീജയാണ് വിവാദത്തിന് വഴിയൊരുക്കിയത്. ‘ഓണം മറ്റ് മതക്കാരുടെ ആഘോഷമാണ്, അതിനാൽ മുസ്ലിം വിദ്യാർത്ഥികൾ ഇതിൽ സഹകരിക്കരുത്’ എന്ന് ആവശ്യപ്പെട്ട് അധ്യാപിക രക്ഷിതാക്കൾക്ക് ശബ്ദ സന്ദേഷശമയച്ചതിന് പിന്നാലെയാണ് സംഭവം.
വിവിധ മതങ്ങളിൽ നിന്നുള്ള വിദ്യാർത്ഥികൾ സ്കൂളിൽ പഠിക്കുന്നുണ്ടെന്നും എല്ലാ ആഘോഷങ്ങളും നടത്തുമെന്നും അധ്യാപിക ശബ്ദ സന്ദേശത്തിൽ പറയുന്നുണ്ട്. എന്നാൽ, മുസ്ലിം വിദ്യാർത്ഥികൾ ഓണാഘോഷങ്ങളിൽ പങ്കെടുക്കുന്നില്ലെന്ന് രക്ഷിതാക്കൾ ഉറപ്പാക്കണമെന്നും സന്ദേശത്തിൽ പറയുന്നു.
“നമ്മൾ മുസ്ലിങ്ങൾ ഇസ്ലാമിനെ മുറുകെപ്പിടിച്ച് ജീവിക്കണം. ഓണാഘോഷങ്ങൾ ബഹുദൈവ ആരാധനയുമായി ബന്ധപ്പെട്ടതാണ്. അത് പ്രോത്സാഹിപ്പിക്കാൻ പാടില്ല. നമ്മളോ നമ്മുടെ കുട്ടികളോ ഒരു തരത്തിലും ഓണാഘോഷങ്ങളെ പ്രോത്സാഹിപ്പിക്കരുത്. മറ്റ് മതസ്ഥരുടെ ആചാരങ്ങളുമായി ചേരുന്നത് ‘ശിർക്ക്’ ആയി മാറിയേക്കാം.” എന്നാണ് ശബ്ദ സന്ദേശത്തിൽ പറയുന്നത്.
ഒരു ഡിവൈഎഫ്ഐ പ്രവർത്തകൻ നൽകിയ പരാതിയുടെ അടിസ്ഥാനത്തിൽ കുന്നംകുളം പോലീസ് അധ്യാപികയ്ക്കെതിരെ ബിഎൻഎസ് 192 വകുപ്പ് പ്രകാരം കേസ് രജിസ്റ്റർ ചെയ്തു. അതേസമയം, വിവാദത്തിൽ ഉൾപ്പെട്ട രണ്ട് അധ്യാപകരെ സ്കൂൾ മാനേജ്മെൻ്റ് സസ്പെൻഡ് ചെയ്തു. അധ്യാപികയുടെ അഭിപ്രായം വ്യക്തിപരമാണെന്നും സ്കൂൾ മാനേജ്മെൻ്റിൻ്റെതല്ലെന്നും മാനേജ്മെൻ്റ് പ്രസ്താവനയിൽ അറിയിച്ചു. എല്ലാ വർഷത്തെയും പോലെ ഇത്തവണയും ഓണാഘോഷങ്ങൾ ഗംഭീരമായി നടത്താൻ മാനേജ്മെൻ്റ് തീരുമാനിച്ചിരുന്നു.
അധ്യാപികയെ സ്കൂളിൽ നിന്ന് പുറത്താക്കണമെന്ന് ഡിവൈഎഫ്ഐ തൃശൂർ ജില്ലാ സെക്രട്ടറി വി.പി. ശരത്പ്രസാദ് ആവശ്യപ്പെട്ടു. ഇത്തരം മുസ്ലിം മാനേജ്മെൻ്റ് സ്കൂളുകൾ കുട്ടികൾക്ക് മതേതര വിദ്യാഭ്യാസം ഉറപ്പാക്കാൻ ശ്രദ്ധിക്കണം. ഇതിൽ സർക്കാർ ഇടപെടണമെന്ന് ഡിവൈഎഫ്ഐ ആവശ്യപ്പെട്ടു. ജമാഅത്തെ ഇസ്ലാമിയുടെ ശബ്ദങ്ങളായ, ഓണത്തെ പോലും അപകീർത്തിപ്പെടുത്തുന്ന വിഭജന ചിന്തകളുള്ള അധ്യാപകരെ ജോലിയിൽ നിന്ന് പിരിച്ചുവിടണമെന്നും ശരത്പ്രസാദ് ആവശ്യപ്പെട്ടു.
