വടക്കേന്ത്യയിൽ കനത്ത മഴ തുടരുന്നു; മിന്നൽ പ്രളയം, മേഘവിസ്ഫോടനം

വടക്കേ ഇന്ത്യയിലെ വിവിധ പ്രദേശങ്ങളിൽ കനത്ത മഴയെത്തുടർന്ന് ജനജീവിതം ദുസ്സഹമായി. ഡൽഹിയിൽ കാലാവസ്ഥാ വകുപ്പ് റെഡ് അലർട്ട് പ്രഖ്യാപിച്ചു. കനത്ത മഴയെ തുടർന്ന് റോഡുകളിൽ വെള്ളക്കെട്ടുകൾ രൂപപ്പെട്ടു. സ്വാതന്ത്ര്യദിനാഘോഷങ്ങൾക്ക് മുന്നോടിയായി നിരവധി അടിപ്പാതകൾ വെള്ളത്തിനടിയിലായി. അതേസമയം, ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ വിമാന സർവീസുകൾ സാധാരണ നിലയിലാണെന്ന് അധികൃതർ അറിയിച്ചു.

വരും ദിവസങ്ങളിലും ഡൽഹി-എൻസിആർ, ചണ്ഡീഗഡ്, പഞ്ചാബ്, ഹിമാചൽ, ഉത്തരാഖണ്ഡ് എന്നിവിടങ്ങളിൽ കൂടുതൽ മഴയ്ക്ക് സാധ്യതയുണ്ട്. അതിനാൽ ഈ വാരാന്ത്യത്തിൽ യാത്ര പോകാൻ പദ്ധതിയിടുന്നവർക്ക് ഇത് നിരാശ നൽകും.ഹിമാചൽ പ്രദേശിൽ കനത്ത മഴ തുടരുകയാണ്. ഷിംല ജില്ലയിലെ കോട്ഖായി ഖൽതുനാലയിൽ ശക്തമായ മഴ നാശം വിതച്ചു. കോട്ഖായിയിലെ ഉയർന്ന മലനിരകളിൽ ഉണ്ടായ മേഘവിസ്ഫോടനമാണ് ഇതിന് കാരണം.

രാത്രി വൈകിയുണ്ടായ മേഘവിസ്ഫോടനത്തിൽ റോഡരികിൽ നിർത്തിയിട്ടിരുന്ന നിരവധി വാഹനങ്ങൾ അവശിഷ്ടങ്ങൾക്കിടയിൽപ്പെട്ടു. ഒരു പെട്രോൾ പമ്പിന് മുന്നിലും അവശിഷ്ടങ്ങൾ വന്നു വീണു. പമ്പിന്റെ പകുതിയോളം ഭാഗം അവശിഷ്ടങ്ങൾക്കടിയിലായി. പെട്രോൾ പമ്പിലെ ജീവനക്കാർ ഓടി രക്ഷപ്പെട്ടു. കോട്ഖായിയിൽ മേഘവിസ്ഫോടനം കാരണം ആളപായം ഒന്നും റിപ്പോർട്ട് ചെയ്തിട്ടില്ല. ഇന്നും കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്. ഓറഞ്ച് അലർട്ടാണ് പുറപ്പെടുവിച്ചിരിക്കുന്നത്.

ഇന്ന് രാവിലെ മുതൽ ഡൽഹി-എൻസിആറിൽ നിർത്താതെ പെയ്യുന്ന മഴ ചുട്ടുപൊള്ളുന്ന ചൂടിൽ നിന്ന് ആശ്വാസം നൽകിയെങ്കിലും, പല സ്ഥലങ്ങളിലും രൂക്ഷമായ വെള്ളക്കെട്ടിന് കാരണമായി. കനത്ത ട്രാഫിക് ബ്ലോക്കുകൾ കാരണം ഓഫീസുകളിലേക്കും സ്കൂളുകളിലേക്കും പോകുന്നവർക്ക് വലിയ ബുദ്ധിമുട്ടുകൾ നേരിട്ടു.

ഡൽഹിയിലും നോയിഡ, ഗുരുഗ്രാം തുടങ്ങിയ നഗരങ്ങളിലും ദിവസം മുഴുവൻ നേരിയതോ മിതമായതോ ആയ മഴയ്ക്ക് സാധ്യതയുണ്ട്. ഇതിനെത്തുടർന്ന് കാലാവസ്ഥാ വകുപ്പ് ‘യെല്ലോ’ അലർട്ട് ‘റെഡ്’ അലർട്ടായി ഉയർത്തി.

ഉത്തർപ്രദേശിലെ ലഖ്‌നൗവിലും മീററ്റിലും രാവിലെ മുതൽ കനത്ത മഴയാണ് പെയ്യുന്നത്. കനത്ത മഴയെത്തുടർന്ന് പല ജില്ലകളിലും സ്കൂളുകൾക്ക് അവധി നൽകി. കനൗജ്, മൊറാദാബാദ്, ബറേലി, ഝാൻസി ഉൾപ്പെടെ 58 ജില്ലകളിൽ കനത്ത മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകി. ലഖ്‌നൗവിലെ ഗോമതി നഗർ അടക്കമുള്ള നഗരത്തിലെ പല ഭാഗങ്ങളും വെള്ളത്തിനടിയിലായി. ആളുകൾ കാൽമുട്ടോളം വെള്ളത്തിലൂടെ നടക്കുന്ന കാഴ്ചയും കാണാമായിരുന്നു.